Сталинград патĕнчи çапăçура çĕнтернĕренпе 70 çул çитнине халалласа Комсомольски 1-мĕш вăтам шкулĕнче тĕрлĕ мероприятисем иртнĕ. Акă 3 «а» класра вĕренекенсем шкул тата район библиотекисене çитсе Хĕрлĕ Çарăн иксĕлми паттăрлăхĕ çинчен калакан кĕнекесемпе паллашнă, нумай çĕнни пĕлнĕ. Шкул библиотекарĕ Р.Н.Свистунова вĕсемпе истори урокĕ ирттернĕ, викторина йĕркеленĕ.

Настя Ильина республикăри «Эткер» центрăн Сталинград патĕнчи çĕнтерĕве халалланă конкурсне хутшăнса çăмăлах мар ыйтусем çине хурав тупнă, ачасем умĕнче тухса калаçнă.

Çавăн пекех вĕренекенсем «Çĕр тата çынсем» музейре пулса вăрçă çулĕсене халалланă стендсемпе, экспонатсемпе паллашнă, вăрçă тискерлĕхне туйма пултарнă. Юлашкинчен ачасем «Сталинград паттăрĕсем» презентаци хатĕрленĕ.