Ака уйăхĕн 18-мĕшĕнче Комсомольски районĕнчи Хырай Ĕнел ялĕнчи культура керменĕнче чăваш халăх поэтне Валерий Туркая халалласа „Туркай вулавĕсем-2023” Республикăри  V-мĕш поэзи фестивалĕ иртрĕ. Ăна ачасен  пултарулăхне туптама пулăшас, ачасен чăвашла вĕренес туртăмне çĕклес, чĕлхе пуянлăхне туйма пулăшас, илемлĕ пуплев ăсталăхне аталантарас тата чăваш чĕлхине упраса хăварас ыйту çине тимлесе пăхтарас, ăна пуянлатса пыма хавхалантарас тĕллевсемпе йĕркелерĕç.

Фестивале Комсомольски, Елчĕк, Канаш районĕсенчи вĕрентекенсемпе вĕренекенсем хутшăнчĕç. 5-11 классенче пĕлÿ пухакансем В.Туркай шăрçаланă хайлавсене пăхмасăр каларĕç. Хайлавсене пăхмасăр каланă чухне конкурсантсем чăвашла тĕрĕс те илемлĕ, килĕшÿллĕ те çыпăçуллă вуланине хакларĕç. В.Туркай тĕнчине кĕрсе кайса хайлав шухăш-кăмăлне, туйăмне, чĕлхе пуянлăхне, сăмах вăй-хăватне кăтартма пĕлнине шута илчĕç.

Комсомольскинчи 1-мĕш шкулта вĕренекен ачасем те фестивале хастар хутшăнчĕç. 5а класри Щетинкина Настя тата 6к класри Шуряшкина Аня хăйсене лайăх енчен кăтартрĕç, жюри членĕсене тыткăнларĕç. Маттур хĕрсем çĕнтерÿçĕсен шутне кĕме пултарчĕç. Вĕсене дипломсем парса чысларĕç.  Эпир Настьăпа Аньăна тата вĕсен вĕрентекенĕсене саламлатпăр! Татах та çитĕнÿсем тума сунатпăр!