Чăваш Республикин вĕренÿ институчĕ шкул ачисене чăваш чĕлхипе, литературипе тата культурипе кăсăклантарас, ачасене халăх культурипе, ăс-хакăлпа шухăш-кăмăл пуянлăхĕпе паллаштарас тĕллевпе интернет олимпиада ирттерчĕ.

Олимпиадăна Чăваш Республикин тата республика тулашĕнчи вĕренÿ организацийĕсен 5–11 класĕсенче вĕренекен 500 ытла ача хутшăнчĕ.

Хуравсене тимлĕ пăхса тухнă хыççăн жюри ачасенчен ытларахăшĕ тĕрĕс хуравланă ыйтусем тест формипе тунисем пулнине палăртрĕ.

Йăнăшсем, тĕпрен илсен, чăваш чĕлхин нормисене пĕлменнипе тата вырăс чĕлхи витĕмĕпе пулаççĕ.

Тĕпрен илсен, олимпиада аван иртрĕ. Комсомольскинчи 1-мĕш ватам шкул ачисем те асăннă олимпиадăна хастар хутшăнчĕç, ăсталăхĕпе палăрчĕç. 5-6-мĕш классем хушшинче Щетинкина Анастасия тата Гордеева Анастасия çĕнтерÿçĕ ята тивĕçрĕç. 7-мĕш класра вĕренекен Ефремова Ева – çĕнтерÿçĕ, Тихонова Яна, Пермякова Анна тата Калюканова Елена – призерсен шутĕнче.

Олимпиадăна хутшăннă мĕн пур ачана, вĕрентекене тав тăватпăр. Çĕнтерÿçĕсене саламлатпăр, вĕренÿре ăнăçу, хастарлăх сунатпăр!